Saturday, October 23, 2010

ဒိုင်ယာဘောလစ်ခ် ဒိုင်ယာလော့ခ် ဒိုင်ယာလက်တစ်

ခုတော့ ကိုယ်တို့ အိုက်စင်ကလင်တွေဝယ်စားကြတယ်
ကလေးတွေကလည်းကြိုက်တာကိုး
လူငယ်ဘ၀ဟာအတော်တက်ကြွဖွယ်ရာကောင်းလှတယ်
မြစ်ကူးတံတားကြီးတွေဟာ အံ့ဖွယ်သရဲပဲ
ဘင်္ဂလားပင်လယ်အော်မှာအထီးကျန်အလုပ်ထဲပျော်အောင်နေခဲ့စဉ်က
ကျနော်ဟာရှေးမာ့စ်ဟေနီနဲ့တခန်းတည်းတက်ခဲ့ဘူးတယ်ဆိုတဲ့
ယဉ်ကျေးတဲ့အိုင်းရစ်အင်ဂျင်နီယာတယောက်နဲ့အလုပ်ထဲမှာတွေ့ခဲ့ဘူးတယ်
သူဟာ နယူးယော့နဲ့လန်ဒန်ပဲ အိုင်ယာလန်တော်လှန်ရေးအကြောင်းတခွန်းမှပြောမသွားခဲ့ဘူး
နေနဲ့ထုတ်တဲ့လျှပ်စစ်ဓါတ်ဆိုတာကလည်း နောက်ထပ်အံ့ဖွယ်သရဲပါပဲ
နောက်တော့ကာရာအိုကေခေတ်ကိုရောက်တယ်
လူငယ်တွေဟာအသက်သုံးဆယ်လောက်ရောက်တာနဲ့ညနေဘက်ဆိုညောင်းတတ်နေပြီ
လှည်းတန်းမှာ နိုင်ငံခြားဘာသာသင်ကျောင်းတွေ အကြော်ဆိုင်တွေ
တခြားဆူလွယ်နပ်လွယ်တွေများ ကြိတ်ကြိတ်တိုးပဲ
စည်တယ် စီဘီယာဆိုင်တွေ အမြုပ်တွေကလည်းစီစီထနေတာပဲ
၁၉လမ်းမှာတရုတ်ဆိုင်တဆိုင်က ဒေါင်ကနဲဆိုအကြော်ခံဒယ်ပြားကြီးကိုခေါက်လိုက်ရင်
ညှော်နံ့တွေဟာလုံးကနဲပဲ ကျနော်တို့ရှုကြတာပါပဲ
သွေးပေါင်ချိန်ဖို့ဆိုတာ အကြောတက်တယ်ဆိုတာ ကိုယ်တော်ပြီနဲနဲများနေပြီတို့ဆိုတာ
ဘယ်တုန်းကမှမကြားခဲ့ဘူး ခုလို ၅၀၀ မီလီလီတာဘီယာဘူးဆိုတာ
ဒီလိုပဲပေါ့ အချိန်ကာလဟာ ကိုယ်တွေ့ဘူးသမျှ ယှဉ်နိုင်သူမရှိပါဘူး
ဘာမဆိုဖြစ်နိုင်တယ် ဘာမဆို တကယ့်ကိုဘာမဆိုပဲ
ကိုယ်ကတော့ပျော်တာပါပဲ
ဆရာစံလမ်းမှာ ထော်လီကွေ့မှာ သခင်မြပန်းခြံမှာ ဗိုလ်ချုပ်အောင်ဆန်းလမ်းမှာ ဘီပီအိုင်မှာ
အင်းစိန်ပန်းခြံမှာ ဂွတ်တလစ်မှာ တာမွေအ၀ိုင်းမှာ အင်းလျားကန်စောင်းမှာ တွေ့တဲ့ဆိုင်ထိုင်လိုက်ကြတာပါပဲ
တောသားဆိုပေမဲ့ ကိုယ်ဟာရန်ကုန်ကိုလက်ဝါးပေါ်တင်ပြီးလှည့်ပစ်သလိုသွားတယ်
ရင်ခွင်ထဲထည့်ပြီးလည်းချစ်ခဲ့ဘူးတယ်
ခုတော့အရာရာချိန်ဆရတယ် အိုင်ဂိုးတူအော့ဖစ်စ်ရက်စတာဒေး ဆိုတာမျိုးမပြောမိအောင်
စိတ်ချကျနော်နောက်နေ့စောစောရောက်အောင်လာခဲ့မယ်ဆိုတာမျိုး မပြောမိအောင် အမျိုးမျိုးပေါ့လေ
ကိုယ့်မြို့လေးတော့ရေဒါဏ်မိုးဒါဏ်က နလံမထူသေးဘူးတဲ့
အင်ဂျီအိုတွေရှိသေးတယ် မယ်လမင်းမပါတဲ့နို့မှုန့်တွေ ရေမယိုတဲ့တာလပါတ်ဖျင်စတွေ
အော်ခေတ်ကြီးများပြောပါတယ် မွေးကင်းစလေးကစလို့ သေကောင်ပေါင်းလဲအရွယ်ကြီးထိ
ထောင်ချောက်တွေနဲ့ စစ်တုရင်မှာနေ့မီးညမီးကူးတုန်းက အဆိပ်ပွန်းလိုင်းခွဲနဲ့အောင်မြင်ခဲ့ဘူးတယ်
ကိုယ်ဟာယုန်လိုအပြေးသန်တယ် ပရွက်ဆိတ်လိုရှေ့ကကောင်နောက်လိုက်ပြီး
အစာရှာတယ် နွားလားဥဿဖ ဗျုဟာကိုသိတယ် စစ်ခေါင်းတည်ရာဇွတ်ဝင်ထိုးတတ်တယ်ပေါ့
ခါတရံ ဆင်ခြင်ညာဏ်ကလည်းတိရိစ္ဆာန်သာသာပါ သို့ပေမဲ့အလုပ်ဖြစ်တယ်လေ
ချစ်ခင်သူတွေရှိတယ် မုန်းသူတွေရှိတယ် အချောင်သမားထင်ချင်သူတွေရှိတယ်
အနစ်နာမခံနဲ့တားတဲ့သူတွေလည်းရှိပါတယ် ဒီလိုပေါ့
အဖြစ်နဲ့အပျက်ဟာခေါင်းနဲ့ပန်းပဲ ခေါင်းပေါ်ကပန်းပဲ
အခန့်မသင့်ရင် ညူကလီးယားဓါတ်ပေါင်းဖိုတွေဘာတွေနဲ့ဖြစ်ဦးမှာ ဒီတော့
တောမှာပွင့်တဲ့ပန်း တောမှာပဲလန်းဆန်းစေချင်တယ် ဆိုတဲ့အတွေးအခေါ်မျိုးနဲ့တော့
မဖြစ်ချေဘူးပေါ့ဗျာ

KZကေ

2 comments:

  1. ခုတလော ကဗျာတွေက ကျွန်တော့်အကြောင်း စောင်းရေးထားသလို ဖြစ်ဖြစ်နေလို့၊ နည်းနည်းအားရှိတဲ့ အချိန်မှ လာဖတ်ဖြစ်တယ်။

    ReplyDelete
  2. မရည်ရွယ်မိပါဘူးဗျာ

    ReplyDelete